Arsenal Oo Garaacday Wolves Siina Dheeraystay Hogaankeda Horyaalka Premier League

Kooxda Arsenal ayaa guul dirqi ah ka gaartay kooxda Wolves kulan ka dhacay Emirates Stadium kulan ka tirsanaa Premier League.

Kulanka ayaa ahaa mid ah Arsenal si dar-dar leh ku bilaabatay ciyaarta iyaga oo doonayay in ay goolal dhaliyaan.

Daqiiqadii 6-aad ayay Arsenal dhalisay goolka furitaanka waxana u dhaliyay xiddiga Bukayo Saka kaas oo hogaanka u dhiibay kooxdiisa.

Arsenal ayaan halkaas ku joogsan waxana ayna sii waday dadaalada iyo weerarka ay qaadayso.

Daqiiqadii 13-aad ayay Arsenal dhalisay goolka 2-aad waxana u dhaliyay xiddiga Martin Odegaard kaas oo ciyaarta ka dhigay 2-0 ay Gunners ku hogaaminayso.

Waxa sidaas ku dhamaatay qaybta hore ee ciyaarta oo ay labada kooxood ku kala nasteen iyada oo Arsenal 2 gool ku hogaaminayso.

Qaybta dambe ayaa ahayd mid ay Arsenal si dagan u ciyaarayso isla markaas ayna ku deg-degayn in ay goolal ka dhaliso Wolves.

Daqiiqadii 86-aad Wolves ayaa dhalisay goolka bar-baraha waxana u dhaliyay xiddiga Matheus Cunha kaas oo ciyaarta ka dhigay 2-1.

Waxa sidaas ku dhamaatay ciyaarta oo ay Arsenal guul dirqi ah ka gaartay Wolves siina dheeraystay hogaanka Premier League.